Monday, 26 October 2015

மீண்டும் விதைக்கலாம் தமிழ்

"வீரம் சேர்ப்பது தாய்ப்பால் " என்றான் பாரதி . ஆனால் இன்று சில தாய்மார்கள் தங்களது குழந்தைக்கு தொடர்ச்சியாக தாய்ப்பால் ஊட்டினால் தங்களது அழகு பாதிக்கப்படும் என்ற தவறான கருத்து நிலவுவதைப் போல தமிழில் பேசினால் தனக்கு இழுக்கு என்பதாக பலர் தவறான எண்ணம் கொண்டுள்ளார்கள். ஆனால் ஏனோ நான்  மழலைப்  பருவத்தில் எனது தாயார் புகட்டிய தாய்ப்பால் வீணாகிப் போனதாகவே கருதிகிறேன். காரணம் நான் எல்லா விசயங்களிலும் வீரனாக இல்லை. குறிப்பாக மொழி விசயத்தில் நானும் ஒரு கோழையே. இதன் காரணத்தை ஆராய்ந்த பொழுது எனக்கு சித்தர்கள் கூறிச் சென்ற பழமொழி நினைவிற்கு வருகிறது " காலையில் இஞ்சி கடும் பகல் சுக்கு மாலையில் கடுக்காய் என மண்டலம் கொண்டால் கோலூன்றி நடக்கும் கிழவன் கூட கோல் வீசி நடப்பான் " ஆனால் இன்று நானும் எனது சமுதாய மக்களும் ஒரு மண்டலம் அல்ல பல மண்டலங்களாக நாகரிகம் என்ற பெயரில் ஆங்கிலம் என்னும் போதையால் தள்ளப்பட்டுள்ளோம். முழுமையாக 20 நிமிடங்கள் கூட ஆங்கிலத்தில் பேசத் தெரியாத நான் 300 ஆண்டிற்கு முன் வந்ததை முன்னிறுத்தி பல்லாயிரம் ஆண்டு முன் தோன்றிய தமிழை வினைச் சொல்லிற்கு ( bus ல வந்தேன், சென்றேன் ) மட்டுமே பயன்படுத்தி வருகிறேன். ஆனால் இந்த நிலை நிரந்தரமாக நீடிக்க விரும்பவில்லை. வீரம் நிறைந்த என் தாய் தமிழ் நாட்டில் சிறு வயதில் எனக்கு பல நேரங்களில் என் தாய்  தமிழ் கதைகளைக் கூறி சோறூற்றினாள். அப்படி கூறியதை நான் நினைவு படுத்தி பார்க்கையில் கூட அதில் ஆங்கில மொழி கலந்ததாகத் தெரியவில்லை. நம்மை எதிர்த்துப் போராட வழியில்லாமல் நம் நாட்டை விட்டு ஓடிய வெள்ளையர்கள் கோழைகள் ஆனால் நாம் அந்த கோழைகளின் தாய் மொழியைப் பின்பற்றி வருகிறோம் " உலகமே உன்னைத் திரும்பிப் பார்க்க வேண்டுமெனில் நீ யாரையும் திரும்பிப் பார்க்காதே " - ஹிட்லர். ஆனால் இன்று தூய மொழியில் பேசினால் சமுதாயம் என்னை ஏளனம் செய்கிறது. அதற்காக நான் ஆங்கிலம் வேண்டாமென்று கூறவில்லை மாறாக தமிழை மறக்க வேண்டாம் என நினைக்கிறேன். கனிம வளங்கள் நிறைந்த நம் நாட்டில் இப்பொழுது பற்றாக்குறை ஏற்பட்டுள்ளதைப் போல தமிழ் மொழியும் வற்றிக்கொண்டு உள்ளது .இதை மீண்டும் விதைக்கலாமே? அப்படியானால் இதை யார் செய்வது? நான் தானே செய்ய வேண்டும் அப்படியெனில் எனக்கு வழிகாட்டுவதுயார்? என்னை வளர்த்த பெற்றோர்களா? ( அ ) ஆசிரியர்களா இல்லை நாளைய படைப்பாளியாகத் தன்னை செதுக்கிக் கொண்டிருக்கும் கவிஞர்களா, எழுத்தாளர்களா, இலக்கியவாதிகளா முடிவு உங்களிடமா இல்லை முயற்சி என்னுடையதா? எனக்கும் நிலம் உண்டு. நிலத்தில் விளைச்சல் சரியாக இல்லையென்றால் பல விதமான உரங்களைப் பயன்படுத்தி அவற்றை சரி செய்ய முயற்சி செய்வேன். அதைப் போல எனது தமிழும் சில ஆண்டுகளாக நோயுற்று மெலிந்து கொண்டு வருகிறாள். தேவை மருந்து இல்லை. மருத்துவர் தான். ஏராளமான மருத்துவர்களை உருவாக்கியதாக பெருமை கொள்ளும் நாம் தமிழ் மொழி(பற்றுள்ளவர்களை ) மருத்துவர்களை முழுமையாக இந்த சமூகத்திற்கு தராமல் பாராமுகமாக இருப்பது ஏன்? மருத்துவனுக்கு மனித நேயம் தேவை. ஆனால் நமது தாய்த்  தமிழ் மனித நேயம் மிக்கவள். நம்மையும் நமது முன்னோர்களையும் இணைத்தது தமிழ் தான். நாம் அனைவருமே மனித நேயம் மிக்கவர்கள் தான். அதனால் தான் நம்மையும் அறியாமல் சிறிது சிறிதாக அதற்கு அச்சாரமாக முதலில் ஆங்கில மருந்து தவிர்த்து சித்தர்கள் கூறிச் சென்ற தமிழ் மருத்துவத்திற்கு மாறிக் கொண்டிருக்கிறோம். சமீப காலமாக நமது உணவிலும் மாற்றம் விரும்பி பழைய உணவிற்குத்திரும்பிக் கொண்டிருக்கிறோம். வரலாற்றில் பல சரித்திரங்கள் நமது மொழிக்கு உண்டு. அதைப் போல மீண்டும் தமிழை விதைப்போம். இதன் பெருமையை உலகுக்கு உறக்கச் சொல்வோம். கண்ணதாசன் அழகாக ஒரு மேடையில் கூறினார் எனக்கு மதம் இந்து மதம் ஆனால் எனக்கு இன்னொரு மதமும் உண்டு அது தாமதம் " என நகைச்சுவையாக தமது குறையைக் கூறி அடுத்த மேடையில் சரி செய்து விடுகிறேன் என்று கூறுவார். அதைப் போல நமக்கும் தமிழ் மொழிப் பற்று உண்டு ஆனால் சமீப காலமாக அதை நாம் மறந்து விட்டோம். மறதி என்பது இயல்பு தான் அது நிரந்தரமாக கூடாது. எப்படி நமது வீட்டு அலமாரியில் வீட்டுப் பத்திரம் பத்திரமாக உள்ளதோ அதைப் போல அதில் உள்ள தமிழையும் காப்போம்.               
வாழ்க   வளமுடன்
வளர்க தமிழ்.
     அன்புடன்
புதுகை அப்துல்.

Wednesday, 30 September 2015

கணினி வளர்ச்சியில் தமிழ்






கணினி வளர்ச்சியில் தமிழின் பங்கு மகத்தானது என்று சொன்னால் அது மிகையில்லை. காரணம் உலகில் உள்ள அனைத்து மொழிகளுக்கும் மூத்தவள் என் தாய் தமிழ். இன்று விஞ்ஞான உலகில் நாம் பல சாதனைகளை படைத்தும், படைத்துக் கொண்டும்  உள்ளோமா அதைப் போல கணினி வளர்ச்சியில் நமது தமிழும் அசுர வளர்ச்சி கண்டு வந்துள்ளது. ஒவ்வாரு துறையின் வளர்ச்சி பற்றி கூற முடியாது என்பதால் இன்றைய சூழலில் இளைஞர்களின் இரண்டாவது உலகம் என நம்பப்படும் வெள்ளித்திரையில் தமிழ் மிகச் சிறந்த இடத்தைப் பிடித்து அதற்கான அங்கீகாரம் நாள்தோறும் கிடைத்தது நாம் அனைவரும் அறிந்ததே. எனினும் கணினி வளர்ச்சியால் பல தமிழ் படங்கள் தேசிய விருதுகளை அள்ளி வந்துள்ளது. அவற்றில் சில "தங்க மீன்கள் " படத்தில் இடம்பெறும் "ஆனந்த யாழை மீட்டுகிறாள் மற்றும் "காக்கா முட்டை" படம்.மேலும் கணினி பயன்பாடு விரிவானதால் இன்று புலம்பெயர்ந்த தமிழர்கள் வளர்ச்சியில் தற்பொழுது இலங்கை, ஆஸ்திரேலியா, கனடா, இங்கிலாந்து உள்ளிட்ட பல்வேறு நாடுகளில் இரண்டாம் மொழியாக பாட சாலைகளில் கற்பிக்கப்படுகிறது. மேலும் மேனாள் மறைந்த குடியரசுத் தலைவர் அப்துல்கலாம் அவர்கள் கூட ஐக்கிய நாடுகள் சபையில் உரையாற்றும் பொழுது புறநானூறு பாடல் பெருமையை உலகறியச் செய்து தமிழின் பெருமையை பறைசாற்றினார். இன்று பல ஆராய்ச்சி மாணவர்கள் கணினி மூலம் பல செயலிகள் உருவாக்கி அதை உலகிற்கு அறிமுகம் செய்து பலரும் பயன்படுத்தும் வகையில் கணினி பயன்படுத்தப்பட்டு வருகிறது தமிழுக்கு. சமீபத்தில் கூட சட்ட சபையில் பெண்களுக்காக இயங்கி வரும் மகளிர் சுய உதவிக் குழுக்கள் தங்களது கணக்குகளை எளிதில் பராமரிக்க ஒரு செயலி உருவாக்கி அதன் அறிவிப்பை விதி எண் 110 ன் கீழ் முதல்வர் அவர்கள் அறிவிப்பு செய்துள்ளது தமிழுக்குப் பெருமையே. இன்று அரசுத் துறைகள் அனைத்தும் நவீனமயமாக்கப்பட்டு அதிக முன்னுரிமை தமிழுக்குத் தான் என்பதில் ஐயமில்லை. ஆங்கிலேய ஆட்சியில் தோற்றுவிக்கப்பட்ட நீதிமன்றங்களில் தமிழை வழக்காடு மொழியாக்க கொண்டு வர வேண்டும் என்ற கோரிக்கை நீண்ட காலமாக நாடாளுமன்றத்திலும்,வீதிகளிலும் போராட்டம் வலுப்பெற்று வருவது குறிப்பிடத்தக்கது. இவையெல்லாம் சாத்தியமானது கணினி வளர்ச்சியில் தானே. இதையெல்லாம் விட கணினியில் ஒரு பெரிய புரட்சியை  ஆராய்ச்சி மாணவி செய்து முனைவர் பட்டம் பெற்றுள்ளார்.  ஆம்! தமிழில் நாம் தட்டச்சு செய்தால் அது மாற்று மொழியில் எவ்வித இலக்கண பிழையின்றி மொழியாக்கம் செய்யும் செயலியை உருவாக்கி அதில் புதிய மைல்கல் சாதனை படைத்து அது அனைவராலும் அங்கீகரிக்கப்பட்டு முனைவர் பட்டம் பெற்றுள்ளார். சில நேரங்களில் நாம் நமது குணத்தை மாற்றுவோம் ஆனால் கணினி நிலையான ஆட்சியை தமிழுக்கு ஆற்றி வருகிறது. ஒரு முறை சிங்கப்பூர் தந்தை என்று அழைக்கப்படும் திரு. லீ குவான் யூ இவ்வாறு கூறினார். "சிங்கப்பூர் பொறுத்தவரை இந்தியர்கள் என்றால் தமிழர்கள். இந்திய மொழி என்றால் தமிழ் மொழி. எனவே தமிழ் தான் இங்கு ஆட்சி மொழி. இந்திக்கு இங்கு இடமில்லை "என்றார். இதற்கு காரணம் கணினியும், புலம்பெயர்ந்த தமிழர்களும் தான். கணினிசார் துறையில் தமிழின் வளர்ச்சியை உலகமே கண்டு வியந்துள்ளது . இந்தியாவில் எப்பொழுது தாராளமயமாக்கல் கொண்டு வரப்பட்டதோ அப்பொழுதே நம் தமிழ் மொழியும் உலக பொதுமொழியாக்க வேண்டும் என்று ஐ.நா வில்  1991 சூன் திங்கள் 29 கோரிக்கை வைக்கப்பட்டு அதற்கான பதிலும் அதே ஆண்டு சூலை 23 ல் உங்களுடைய நாடாளுமன்றத்தில் தீர்மானம் நிறைவேற்றி அதன் நகலை எங்களுடைய அவைக்கு அனுப்பி வைக்கவும் நாங்களும் பரிசீலனை செய்கிறோம் என்று கூறியுள்ளார்கள். இதன் முயற்சியாக பல விதமான சரித்திரங்கள் கணினி வளர்ச்சியில் தமிழ் கண்டு வருகிறது. "காயும் ஒரு நாள் கனியாகும் நம் கனவும் ஒரு நாள் நனவாகும் "என்ற கவிஞரின் வரிகளுக்கிணங்க நாமும் உலகின் அனைத்து நாடுகளிலும் தமிழின் சேவை தொடரும் என்று நம்பலாம்.
           வாழ்க தமிழ்
           வளர்க கணினி
புதுகை அடிமை.